《亲子战争之二》（微小说草稿）上海广播电视报征稿
　　
　　
　　王老伯戴着老花眼镜悠哉悠哉在书房里看报，老伴张阿姨气呼呼地从外面进来，一把夺过了王老伯手里的报纸，嚷嚷道：
　　“老头子啊，看啥报纸啊，侬看气人伐？到底啥人是媳妇？啥人是阿婆啊？现在社会颠倒过来了，媳妇变我阿婆还凶！好像伊是阿婆，我倒变成了受气咯媳妇了！哎，怪伐？怪伐！只必过，伊比啊拉儿子多赚两张钞票，就觉得了不起了，狠三狠四点啥啊！”
　　“啥事体啊，啥事体啊！老太婆，一清老早，况浪况浪，一只喉咙像喇叭开得响来兮咯，和儿子媳妇咯吵啥点吵啊！”
　　“好啊！侬只死老头子，不帮我出出气也厌卞我啊，气煞我了，气煞我了！”
　　“老太婆啊，有闲话好好讲嘛，五斤狠六斤，做啥啊！心停停，好好叫讲嘛来！”
　　“好好叫讲嘛来，好好叫讲嘛来！我不像侬吃了有空，一天到晚脚翘黄天保，一张报纸一杯茶，越剧淮剧滩簧听听适意来，开心来。我做人一天到晚忙的手脚不停，买菜烧饭，洗衣服，带孙子，拖地板，擦灰尘，还不讨好！连媳妇也来吃我排头，想想气人伐！”
　　“或哟，气点啥气啊，嘎能点小事体气点啥！家务事体，侬评评良心，我老头子不是帮侬一道做啊，侬真好气，多管闲事多吃屁，侬不讲我也晓得，又是为了孙奻菲菲，同媳妇吵了吧？对吧。”
　　
　　“哦哟，侬只老头子还蛮懂经聪明咯，晓得，也不来帮我讲讲儿子媳妇噢，事体不做，千手不动，百事不管，逍遥自在，报纸看看，老酒吃吃，茶喝喝，戏文看看唱唱适意来，袖手旁观，来啦儿子媳妇面前做好人，拿我当冲头，不塞头，事体做煞，恶人做煞，侬门槛倒是蛮精咯啊，会做人啊，一天到晚嘻嘻哈哈，胡海海，开心啊。我做人，无没侬嘎开心。”
　　“啊呀，老太婆啊，我劝侬小人咯事体，不要管得太多，侬偏偏不听。欧，现在好了闹矛盾了吧！侬啊，瞎起劲点啥，管的多了，人家厌卞侬，现代年青人有伊拉一套管小人格办法，老一套东西现在不一定灵咯。儿子媳妇都读过大学，文化知识好好叫比侬高，科学知识比侬懂得多，侬瞎起劲操点啥！非要拿老一套的东西来教育小人，伊拉服帖伐？！欧，侬不是自找苦吃，自找矛盾，自寻烦恼嘛！要我讲，不是啥原则性问题啊，就眼开眼闭，侬非要拿自己一套东西来教育菲菲来事伐？还强词夺理，顽固不化，非要人家听侬咯，动不动拿侬过去教育儿子时咯一套东西来表功，来证明你有教育子女的经验，来事伐？哦哟，做老祖宗家长了，来事煞了，惯老祖宗派头，压服人了，气煞活该！”
　　“哦哟，侬只死老头子，倒蛮坏咯，乘机来了讽刺我啊！叫侬坏，我叫侬坏！”张阿姨又好气又好笑，跳将起来，举起瘪壳壳的美人拳，在王伯伯咯背脊上拼命乱敲着。
　　“哦哟，敲得适意，通经活血，适意适意。多敲敲，多敲敲。侬啊不读书看报，瞎忙，乱管点啥，多管闲事，多吃屁，吃力不讨好，阿旺炒年糕！来来来，我给你看本杂志拿去。”
　　“老头子啊，侬葫芦里卖啥药啊！”
　　张阿姨没好气接过王伯伯递过来的杂志一看，《为了孩子》，迅速翻看了起来。顿时明白了，老头子的用心良苦了。。。。。。
　　
　　发稿於2014年7月28日下午13时45分，上海西部苦雨斋。